وداعا يا نجم

 نجم اتحبس فعصر كل حاكم شوية..خدوا من عمره  واداهولنا كلام يوزن العقول المايلة..يجعلك بكل عقل اتعدل حسنة وبكل يوم حبس فالجنة حوريه

سكت الكلام

سكت الكلام والصوت بقى مبحوح

لا فيك تزعق وتغضب ولا تزيد النوح

كاتم في قلبك كتير كما الجمال صابر

مع إن قالوا زمان يا روح ما بعدك روح

سكت الكلام واندفن جوة مابين ضلعك

يصرخ عليك"أرجوك انا طبعي غير طبعك

عمري ما كنت أسير.. حُر وبلف الكون 

عمري ما اكون خاين ولا هخون صمتك"

سيبني في وش الريح تايه مابين ألسنه

لا اللي فات راجع ولا هنفضل هنا

كل الكلام زائل ماييقى غير أفعال

يا بكرة يبقى عليك او يبقى مكتوبلنا

يا حلم كان ظاهر وسط الكلام ألوان

طول الزمن صابر ولا كنت ندل جبان

أرجوك تصبح حقيقة لجلك صبرت كتير

آن الأوان تبقى..وتفرَّح الغلبان.

Treat them as they Deserve.

Treat people the way you want Yourself to be treated, not the way they Deserve to be treated with. cause you'll never know how Good/Bad they are until you unveil their real faces.

Diet poem

احب النحيفات ولست منهم

وودت أن أكون نحيفا

ولكن الميزان يخذلني

ويحترم ما بقى في من دهونا :/

#شِعر_غذائي_من_الجاهلية

لحظة صمت

لحظة صمت..يتبعها بكاء بدموع لا تنهمر..لكنها محتجزة في الحلق..مكتومة..ليس لها طريق آخر..أحلام مبعثرة..تجمعت فجأة في طريق الإنجاز.. لكنها بلحظة توقفت..وكأن زمانها لم يحن بعد..وكأنها تعلقت في عالم بين الواقع والخيال..وظلّت هناك..وظللت أنا.. ولحظة صمتي.

شيلي بقى همي!

عرفت إيه عن بكرة يا معدوم

تصحي ف يوم وتنام تلقاك ف نفس اليوم

م الموت هتهرب!! أبدا هيوصل ليك

قدرك ينوبك.. ولو فوسط القوم

أمسنا ويومنا صبحوا بحيرة دم

وغدانا كما اللي فات يحمل معاه الغم

ولسه فينا مين ينقهر عاللي ماراح يرجع

ولسه فينا الضمير دايماً يشيل الهم

سمعت من ده و ده "نحيا بكرامتنا"

ماعاد كرامته تفيد ولا سكره و زيتنا

يصدق!! أبدا..وعمره ما كان إنسان

يكذب!! أكيد.. وكتير..ويكتّروا حيرتنا

مشينا ورا اللي قال مصلحتك مع الوطني

ضيع معاه حلمي وضاعت كمان وطني

قولنا خلاص ولابد لازم يكون تغيير

جبنا اللي أمره مطاع..كفر ولاد وطني 

امتى يا ست الكل هتروقي وتحني

لا عاجبك افضل كدة ولا يسيل دمي

ضربت فيكي الودع يا ست محروسة

شايل همومك أنا..شيلي بقى همي!

وكأنها ليست نفس الحياة

الحب حياة ..و الحياة فضاء..تملؤه كيفما تشاء وبما تشاء..إلا أن يشاء ربك و رب كل الأشياء...فإحرص على ملئها بما ثمُن منها..والحب أثمن مافيها..أقدم ما فيها..أنقى ما فيها.. حبًا في الله و لله.. ستجدها إن شاء الإله.. وكأنها لم تكن هي ذاتها..تطهر بها.. تفكر فيها.. تتجلى لك غير تلك التي عشتها.. تتعاظم معانيها.. تشعر بلذاتها.. تفيض بجمالها.. فتسعد أنت بنورها.. ونور آخرتها.

والله زهقت :/

زهقت يا مصر كالعادة

وتوهتيني بزيادة

وراحوا م الأحبة ألوف

ولسه بتشربي سادة

تعبت من الأمل فيكي

بتنسيني ما اجافيكي

تروح روحي ولا تروحي

ولا الاقيكي متصادة

ياست الكل ما تحني

وشدي ضهري واتزني

وانسي اللي كان زمان مني

وبدلي نكدنا سعادة!

مصر ترجع

مصر ترجع لو صبرنا لو تعبنا لو قدرنا

تنهزم لو يوم هُزمنا من عميل سئيل وجُبَنا

مصر مش ممكن هترجع للي كان

عُمر ظُلمك كان يدوم ولا الغباء ف يوم ما كان

لبس ملكي لبس مدني..جلابية..شبشب..طاقية

مش معقول تضحك عليا.. بلدي أغلى م اللي خان

دوس كمان..امنع كمان..إحرم كمان

عمري واحد ربي واحد وانت ربك النفوذ

تكتب بإيديك النهاية طول حياتك يا منبوذ

حسن ظني فيك قتلني عشت عيشة المُهان

كلب سُلطة عبد نفسك فيك غباء فوق الاحتمال

بلعن اليوم اللي خلى قلب زيي ليك يحن

بلعن اللحظة اللي عيني بدموع الفرحة تئن

يوم كسبت خسرت بلدي والهموم صبحت جبال

أمهاتنا نزلت شوارع وحزنها مالي الوشوش وإبني مات جوه جامع وانت ماقدرتش تحوش

الإكادة إن ظلمك فاق خلاص حمل البشر

وإن مهما حاولت ترجع عُمر ماهترجّع قدر

قدرك انك تبقى عبرة للي باع بالرخيص

قدر بلادي تبقى غالية تبقى عاليا كما القمر

إبعد شوية و ركز

ساعات بتكون محتاج تبعد عن كل حاجة وتشوف الأرض من الفضاء الخارجي وازاي الناس بتآكل او بتساعد او بتكمل بعض...مش شرط تكون انت صح ولا حد عالارض دي صح!!

الشرط الوحيد للتعايش مع الناس هو انك تقبلهم "بعبلهم" زي ما هم...ماتحاولش تفرض نفسك وافكارك على غيرك وماتحاولش تغير حد ولا تغير نفسك عشان حد... تغير وتتغير عشان ضميرك يستريح مش عشان ترضي أيا من كان...غير الوحش على قد ما تقدر واتغير وانت محافظ على شخصيتك و مبادئك..ماتعومش ضد التيار وانت مش متأكد أن ده الطريق الصح ..وماتعومش مع التيار وانت لاغي عقلك ومقضيها "هلهلي"... وماتنساش نفسك وأقرب الناس ليك ولا تكرههم لمجرد اختلاف وجهات نظر لان هم دول الباقيين ليك...ماتحاولش تكون غيرك..انت غير أي حد واي حد غيرك!!! نظرية مش صعب تتفهم لو ركزت مع نفسك هتلاقيك أحسن من غيرك ده اللي انت بتطلع تكون زيه وهو أحسن من غيره برضه وهتلاقي أضعف منك بيتطلع يكون زيك..طبيعي لان دي فكرة المثل الأعلى..حلو يكون ليك مثل أعلى لكن في مبدأ!!! بمعنى.. ماتاخدوش كشخص منزه عن الغلط عشان ماتتصدمش واكم من صدمات بالذات ف الوقت ده..ف بالتالي فكرة المثل الأعلى مش صحيحة خد من كل شخص مبدأ يتناسب مع شخصيتك او كون انت المثل الأعلى لغيرك بمبادئك وأخلاقك...وفالاخر حاول تفصل نفسك عن الناس لفترة من وقت للتاني لثلاث أسباب، أولهم انك ماترهقش نفسك بمهاترات مش حقيقية ومالهاش أي قيمة فالواقع..ثانيهم انك تعرف بجد مين اللي يهمه أمرك ومين انت ف حياتة مجرد عدد من ضمن معارفه...تالتهم بقى إنك تعرف تقيم المواقف والآراء بطريقة اكثر إنصافا لكل الأطراف..ساعتها بس هتعرف قيمة نفسك واللي حواليك وتقدر تحط كل واحد ف مكانتة اللي المفروض يكون فيها ف حياتك لا ياخد اكتر منها ولا اقل.

وعلى رأي دنيا "ماتحاولش تبقى حد تاني غير نفسك خليك واثق ف نفسك".

تتر النهاية

في انتظار تتر النهاية لتلك الحياة البائسة فالكل يشعر بأنه غريبا فيها..لا جديد..وما أن تطلب التغيير لترى آخرين ينفرون منه ويقززوا المشهد فنرجع للحلقة الأولى من ذلك المسلسل الممل المعقد..لماذا؟! لأنهم اعتادوا الروتين، تصالحوا مع أعداء النجاح فاصبحوا أصدقاء، ورفضوا مصالحة أنفسهم أولا وكل محاولة لجعل الحاضر والمستقبل أفضل لهم وللجميع..أعداء وليسوا بأعداء..أعداء الحياة..فلتنتهي إذن إن لم نستطع تغييرها..فليسقط كل من خان الكرامة..كل من خان الإنسانية..كل من خان الدين والوطن..فلتسقط تلك الذاكرة التي تنسى.. فلتنتهي هذه الحلقات المًُعاده بتفاصيلها المملة المجردة من معاني الشرف والأخلاق.. كفى تبريرات عقيمة لن تثمر شيئًا عدا المزيد من الحقد والقهر والذل والاستهتار بأحلامٍ لن تتحقق بوجود ذلك الشيطان الأخرس الذي إن تكلم نطق كفرا..ولننتظر جميعا تتر النهاية المؤلمة ونتركها لمن هم أقدر على التسامح والبناء..فنحن لسنا أهلا لتلك الحياة.. فلتسقط كلمة النهاية على تلك الأدمغة المفرغة من محتوى العقل والتفكير المنطقي.. إنها النهاية!

خليك ف حالك

ليس كل چميلا بنظرك چميلا بنظر الآخرين!

ف لست أنت من يضع المقاييس ..و لست أنت من يرى بأعينهم.

شرعيتك

شرعيتك يا ريس يا شهم وهمام

شرعية بتقتل ف كل الأنام

تقولش التتار ولا جمر نار

معدي عليهم برقة وحنان! 

شرعية دي تبقى حماة المدام

يا من كنت عامل حمامة سلام

لناسك وبايع وللأمر طايع

وطظ ف جنابنا إشارة وميدان

شرعية!! يا سوسو! تعالى أما بوسو

يا داخل علينا بسيف أو لجام

شرعية دي طنطك حلاوتك طعامتك

شرعيتك لامؤاخذة أكيد مش تمام

شريعة!! قبلنا علينا وعليك

عملتلها حفلة تسلّم ايديك

فصبحت لبانة ف جامع ف حانة

فباتت معايرة فمات الكلام 

شرعيتك يادكتور دي طلعت بليلة

ودقنك كمان باروكة و عيره

وحارة وزنقة وتوكتوك وخنقة

ونستر فضيحتك فكم من مكان

شرعيتك دي كومة ورق جوه علبه

وكما ذكرّتك ماهيش أي لعبه

وسيبتك تهلس وتنكش وتعكش

وتحكم فاكرها بقالة زمان 

شرعية يا باشا شرعية يا بيه

ولا طلعتوا ساسه ولا حتى..ايه!

ده سوق النخاسه بيتبرى منكم

وسوق النجاسة حليلكم أوام

شرعية دي زهقت وعايزة الطلاق

وتعبت وشقيت وشربت هراء

وماتت وعميت ووقفت معاك

وطبعك تندّل وتطلع جبان

شرعية كمان شرعية كمان

وشكلك نسيت بقية الكلام

وتفضل تقولها وتفضل تعيدها

لحد ما تلقى شرعيتك.. تماااام👌

ألا تعقلون!

ياأيها الإخوان:ألا تعقلون أنهم يريدوها دما لانهاية له!ألا تعقلون أنكم مجرد عرائس ينكسر منها ماينكسر ويرمى منها مايرمى ولا عزاء له!

يا أيها الإخوان: ألا تعقلون أنه إن كانت لكم الشهادة وهم يريدونها فكانوا أقبلوا إليها هرولة قبلكم!

يا أيها الإخوان: ألا تعقلون أنهم لم ولن يبكوكم الا لخدمتهم ولاغراضهم ولمصالحهم!!

يا أيها الإخوان: ألا تعقلون أن المسلم على المسلم حرام دمه وماله وعرضه وان الله لن يحاسب معكم شيوخكم يوم يفر المرء من أبيه!

يا أيها الإخوان: ألا تعقلون أنها عندما ستتحول رمادا لن يبقى لكم ولنا منها الا الرماد!!

يا أيها الإخوان: ألا تعقلون أن إراقة الدم أعظم عند الله من هدم الكعبة .. فما بالك تفعلها فقط لخاطر بعض الأشخاص الغير مبالين بك او بغيرك!

يا أيها الإخوان: ألا تعقلون فيجنبنا الله جميعا شر الفتنة والإقتتال!!

يا أيها الإخوان: ألا تعقلــــــــــون!

هو المصير نفس المصير

وحشتني أيام الصبا والبهججة

كانت حياتنا مفرحه..كانت كده..فعلا كدة

زي قزح ملونة ..ومبهجة

زي الكلام خارج من فُم جدة مكهلّة

حلو الكلام ..معانيه كتير 

في منه أقوى م الرصاص و م القلم

بيقتلك من غير جروح ولا ألم

وبعده راح تفضل تنوح..عشان لساك جواك ضمير..جواك قلق 

ومنه أجمل م العسل و م الدلع والهشتكة

وبيها تبقى طاير م السعادة والهنا..تنسى الهموم.

هو زمان كان فيه هموم؟

طبعا أكيد .. كان فيه كتير..بس الاكيد وف الأخير تلقى السرير..تلقى الدفا!

تلقى الأمان والضحكة زي النسمة مهفهفة

كانت آلالام الحرب والطين والشرف.

لكنهم عاشوا بشرف.. لولا كده..كان لساك عايش ف القرف!

خلاص بقى مابقاش رجوع..مابقاش مكان للدموع..حسرة وألم .. ومافيش ف عمرك اللي يعوض الندم!

مالهوش لزوم.. وما حد أبدا راح يدوق طعم الوجع...غير اللي كان معاك ف يوم صاحب جدع.

ياخد بيدك للي راح  ب آلة زمن

نفس الزمن اللي انت فاكره بالفرح وبالألم

تمسك قلم..تكتب كتاب..عن اللي فات واللي غاب..تلقى المصير هو المصير.. لكن فروق ماهيش كتير.. فرقك وحيد ..وتبلغوا لكل الصحاب..عيشوا بشرف!

Stop it! Now.

You are not that important to ignore them, to  judge them, to treat them superiorly, and even if you were, you don't have the right to do so!

سئمتك

سئمت متاهاتك واوجاعك

ورائحة الموت وضلال أتباعك 

حلمت بكِ أرضا للحب والجمال والتقدم

وجدتك لعبه في يد أطفال بعقول هزيلة

لا يعرفون للحب معنى ولم يروا من الجمال سوى إمرأة إحتجزوها في طيات عباءاتهم أما قمة تقدمهم كانت حين تقدموا هرولة لتهشيم عظام رأس من كان ضدهم رأيا وفكرا. أصبحتي والعبث سواء.. وأصبحت أنا والمجنون بحلمه.. سواء....فإما أن أتلاشى في ثنايات عبثك اللانهائي، وإما أن تنطلقي نحو جنوني.

كان

كان ياما كان..كان فيه هنا إنسان

لا كان بيحلم ولا ليه غير بلاده مكان

وكتير م الغلب ..والقهر والذل!

وقليل من كرامة..وبطاقة..وعنوان!

رساله لكل منافق..إنت قمئ :/

مش سهل أبدا إنك تكون 

عامل هُمام شيال هموم

عامل ياعيني قلبك علينا

لازم تكون على كل لون!

عارف بقيت ولا المسوخ

لا حد طايقك ولا ليه نفوخ

يسمع نصايحك يسمع بواختك

كلك سموم كلك شروخ

على كل لون على كل وش

تشربها ساده تشرب بوش

مساح ب جوخ بياع كلام

بياع لنفسك عشان تقوش

تبقى ذليل لكل جيل

تلقى طموحك بقى مستحيل

من غير ماتسأل إزاي وليه

ماتشوف عمايلك..أكبر دليل

نصيحة مني..من عقل حر

طعم النفوذ ده طعم مر

مش كل مايجيلك زبون

على الجزم تفضل تمُر 

لن نعود سويا!

لست أنا من كان بالأمس فخورا بكينونته..تعالت الأصوات حينها..ولدت من جديد!لم أكن أعلم أنها ساعة يأتي بعدها المزيد من ساعات الخيانة!

تحدثنا كثيرا عن قصص الحب والإنتصار والعزة والكرامة..تهافتنا على الموت بقلبٍ جسور..تنافسنا في شهادتنا..من سيكون في الصفوف الأمامية ومن سيحمي ظهور الآخرين!!! لم يكن هناك من يثني على شجاعتنا ولا من يطعن في نوايانا..كنا كالجسد الواحد!

الآن ..إن سألت..كلا..لم نعد كذلك..كلٍ في طريقه..صواب كان او خطأ..الأكيد أننا لن نعود لنفس الدرب سويا!

الناس مواقف

الناس في حياتك زي القماش!!

في قماش تلبسه يشكشك فيك ولا الحيه

وقماش تلبسه كأنه أحن م الحرير .. عمرك ماتعرف إذا كان اللي بيشكشكك ده بيكرهك ولا الحرير فعلا حنين عليك ..الا لو جربتهم كذا مره في ظروف مختلفة..ساعتها بس هتتأكد انه ساعات اللي بيقرفك ده بيحميك وان الحرير طلع ١٠٠٪ بوليستر :/

أنا اللي ماتعرفوا قيمته

انا الغلبان 

انا الزهقان 

انا الطهقان من عيشته

انا المجروح

انا المدبوح

وكان له طموح ولقى خيبته

انا اللي جعان

ما نام شبعان

وضاعت ف الطابور هيبته

انا المخنوق

ومالي حقوق

وزادت في الدروب حيرته

انا المسحول

وجاله فلول

يزايدوا في شرفه ونزاهته

انا اللي كان

في يوم إنسان

يا ملو هدومه يا حلاوته

صبحت رخيص

وباعني خسيس

وباع الكل بغباوته

انا اللي خانوه

ولعنوا أبوه

اما اختلفت مع سعادته

انا الكافر

انا السافر

ده اسمي بعد ما جيبته

انا المهووس

باخد فلوس

ف وقت اما نجيب سيرته

انا الألوان

لكل جبان

يلوني لمصلحته

انا الثائر

انا القادر

على كل ظالم وعشيرته

انا السكينه ف ضهوركم

انا الشوكه اللي ف حلوقكم

انا الكوابيس لكل خبيث انا اللي ماتعرفوا قيمته

إفرح

حاجات صغيرة بتفرح الواحد وبتسعد يومه حتى لو كلمة او حرف زي مثلا لو قلت انا"و"انت غير لما أقول انا"او"انت!

وحاجات أصغر تطيرك م الفرحة زي ابتسامة طفل ف وشك او حضن من اللي بتحبه او دعاء ليك م حد مايعرفكش بس حسيته بيدعيلك م قلبه!!

دورك تدوّر عالحاجات الصغيرة دي عشان تسعد نفسك بيها وما تعديش عليها كأنها حاجات عادية بمعنى ماتخليهاش تمر عليك مرور الكرام لان انت المستفيد!

سعادة حياتك ف أيدك ..لو مسكت ف الحاجات الحلوة دي وتبت فيها قوي...حب نفسك بس ماتبقاش أناني .. حبها عشان تضحكلك وتحبك هي كمان ..صباحكم حلو :)

نصيحة على ما قسم

نور يا حلو شموعك في ليالي القهر

ماتقولش العتمة صبحت بطول الدهر

دي هي دايما كده تشبه لموج البحر

ف لحظة بتفرحك وف غيرها تبقى آهات 

اوعى تلوم مظلوم سكت عشان محروم

حاسب تصبح ف يوم سجان او مسجون

حاول تكون مبسوط وعاقل مش مجنون

خليك دايما جدع مش بس ف الخناقات

وريهم انت مين!! ابن النيل والهرم

إياك تقول أمين !! لو الكلام مش محترم

إياك تبيع ضميرك للي ناصبالك لغم

والكداب والأناني..حرّص من دول بالذات

ده دنيتك رزقك وخيرها من تعبك

استفتح انت اليوم بضحكة من قلبك

ممكن تلاقي الكون ف ثانية يضحكلك

والصحبة تحلالك حتى ف أصعب حالات

إوعاك توعد وتخلف وتزور ف الحقايق

إوعاك تأمن لخاين او تخون وتبقى رايق

إوعاك تنسى حزنك واتعظ منه ف دقايق

دي نصيحة ليك يا خلّي قبل ماييجي السكات

تعديلات غير معدلة :/

فقدنا المبادئ فأصبحت الأشياء كذبة كبيرة نعيش فيها..واصبح أنبلنا وأطهرنا هم أكثرنا مقدرة على الكذب ومابقى منا ساذج تافه مطأطئ الرأس لا حول له ولا قوة غير القبول بالأمر المحتوم وإن إعترض فإما أن يصدق كذبهم وإما أن يعذب ويموت بصدقه :/

شيل الهموم عالرف

شيل الهموم عالرف تلقاها كأن لم تكون
عيش الحياة وحدك تحمل هموم بالكوم
حط لنفسك يا ولدي بدل الهدف أهداف
يمكن بضربة حظ تلقى القليل..مليون!

شيل الهموم عالرف واحسب للزمن حسبه
لا هينفعك مخلوق ولا واسطة ولا حسبه
دي كلمة واحدة محتمل ترميك ورا شمسها
وحرف واحد يخليلك من كل خير نسبه

شيل الهموم عالرف وخلي نظرتك قدام
إوعاك تبص لورا وتنكس الأعلام
إوعاك لا تنسى وقفة صديق في طريق
وإحذر ف ثانية العدو يبدورلك الأحلام

شيل الهموم عالرف وإعرف طريق خيرك
غير حياتك وإنت بتعدل حياة غيرك
لا عمر الدنيا "أنا" ولا يحمل غلطتك "إحنا"
ولا مكتوبلك حلوها ومرها لغيرك!

صباحنا وليلنا بكى

بيجي علينا الصبح ويشقشق
ونسأل ليه يا فرح لم تبدأ
أتاري الفرح مش مكتوب لأهالينا
وأتاري الحزن فقلوبنا متعشق

راح اللي راح من كبدنا الغالي
والموت إنتقى الرخيص منا والغالي
ولسه الظلم قابض ع اللي كان لينا
ولسه الدمع ف عيونا ولا يبالي

عمرك يا ولدي لأجله الشعور شابت
حنيت ضهور أكم وقلوب عليك دابت
ولا اللي قتلك قتله ممكن يداوينا
ولا اللي ظلمك راحته ف الجفون باتت

بييجي علينا الليل طويل ويداوي
ونحكي عليك يابطل أجمل حكاوي
وندعي يكون فالجنة نصيب لينا
وندعي عاللي سرق صوت الغناوي

لا شئ أبدا !

لا شئ أبدا..سيغير معنى الإنسان
لا الحرب ولا السلم ولا حتى تغيير العنوان
لا شئ سيمحو من ماضينا كم الأحزان
لا شيئًا غيرك يمكنه بناء الأوطان

لا شئ أحقر من مساواتك بالحيوان
لا أظن أنك يومًا تسمح بالطغيان
لا شئ يقلل من قيمة حبك للإحسان
لا شيئًا غيرك يمكنه تخطي الطوفان

لا شئ أحب إليك من حرية موج الشطئان
لا أسعد قلبك غير هدير المطر الحيران
لا شئ يعكر صفو حياتك إلا البُهتان
لا شيئًا غيرك يقلب صفحات العصيان

لا شئ أبدا غيرك أيتها الأحلام
لا أريدك إلا أملا في عدلٍ وأمان
لا شئ يغير رأيي في دنيا الظلم إلا العرفان
لا شئ غيرك يروي ماء الحرية للظمآن.

وجوه تنكشف

المرض يكشف الوجوه
والصحة تُداريها
والموت يصبغها جميعا بالحزن المؤقت عن قصد أو بغيره!

عقلك ف راسك وإياك تيأس

إوعى تيأس ..إوعي تيأس م الحياه
لسه طريقك ما وصلش لمنتهاه
النهاية جاية جايه.. ف يوم ف عشره او ف ميه
إوعى تنسى إن موتك كان حياه
عمرك دفعته صوت نقي
حط عليه اللي كان تقي
سرق صوتك لعن سكوتك
باعك لخاين كان وفي
مستقبل الارض في عينيك
حياة ولادك بين ايديك
انت الطريق ..انت الصديق
انت الوحيد اللي يحقق مطلبي
إوعى تظن ان الآلام مابتنتهيش
إوعاك تقول إنه خلاص..مابقاش مافيش
إبني من دمارك ألف بيت..عشان تعيش
إياك وحرص م الخسيس وم الغبي

ضحك الهموم أحمال :/

باضحك وقلبي م الآهات مجروح
ببكي ودمعي عالخدود ممسوح
خذلت نفسي أكيد..والبشر خذلوني
ماعرف كلام ده ولا..صوتي بقى مبحوح

باضحك وضحكي م الهموم عالي
عقلي خلاص إتجن ولا إنشغل بالي
يا شاغله عقول أكم..آن الآوان تنهضي
من غفلة الخيبة وتنقذي المدبوح

باضحك عليا ولا.. باضحك من المكتوب
حملك بقى أطنان ومابينش منها هروب
تعبت من دا العجز وإيديا مغلولة
أقفل بيبان الهم ألقى أكم مفتوح

باضحك وأنا عارف إن الطريق أميال
وكل خطوة فيه..تتكال بمية مكيال
إديني بس الأمل إن البُكا هيزول
وأنا وعدي أقول أسمك..لما الهتاف منبوح

باضحك وببكي في نفس ذات الوقت
زهقت من حالك..وحالي قليل البخت
أبوس ترابك بقى.. إظهري الكرامات
ولا عشان حبك..الفرح مش مسموح

كون نفسك

هتلبس توب غيرك..هتعاني فوق عمرك أعمار..هتلبس توبك إنت..هتعاني برضه بس عمر واحد..اللي حيلتك..قسمتك !

إفتح عينيك للدنيا بكل حذر

افتح عينيك للدنيا لف وشوف.. دي الحياه فيها ياما وياما ظروف... لا بتحن عالفقرا ولا بتحمي غني ..لكن في ايديك تعيشها من غير خوف..
إفتح عينيك للدنيا بص و طل.. إوعاك تنحني لما يهون الذل.. إوعاك تنسى حلم العيش بحرية.. هي اللي باقيالنا مهما يموت الكل..
إفتح عينيك للدنيا بص كمان.. هتشوف بطولها وعرضها أكم حيوان.. فيها ال يفترسك كما لو كان أسد.. وإنت بلا حولَ تعيس غلبان..
إفتح عينيك ليها بس ماتبرقش.. أنوارها تعمي عينيك وبرضه ماهتلحقش.. لا تاخد بكف كفيف ولا الطريق يظهر.. بصلها بطرف العين وعيشها من غير قفش..
إفتح عينيك ليها بكل حذر.. إوعى تخاف من العفاريت أو مالبشر..لكن خلي العيون ف وسط الرأس مفتّحين.. ولا تبكيهاش عاللي خانك أو ليك غدر.
إفتح عينيك ليها وإياك يغيب عقلك.. لا تمشي ورا كذاب ولا اللي يحلقلك.. قالك يا ولدي زمان واحد كأنه حكيم.. عقل البشر أنواع تهلِكها أو تهلَك..

مواطن مطحون متوسط الدخل

عجبت لزمان ..الولاد الأشقيا
قال ايه عاوزله لقمه زي الاغنيا
وشغلانه مهمه.. وبيت لجل الدرا
قولتله ياخي وضح!! أصلي من الأغبيا
قالي دي العيشه مره وكله فالهوا
الست امي العجوزة طلبالها ميت دوا
والحاج كمان اهوه ..مأنسنا يا سكره
ومراتي "عايزه..عايزه" تقولش سفير نوايا ولا مخبي الخبايا..ماهو علي عينك يا تاجر ده زير سانده النوا
وعيالي ٣ يا بيه.. دي نصيحة ماما كريمة
وبرضه العيشه صعبه وفلوسي مالها قيمة
عيل يا دوب ف ثانوي والحصة مرتب شهر وأنا بين درسه الخصوصي وخروجاته المخصوصي داير علي كعب رجلي وأهوه عايش ف قهر
الوسطاني ده غلبان..قاعد أيده على خده
اقوله خير يا حبيبي..يقولي عاللي عنده
عايز تليفون يا أبويا إوعى يكون أبو خطين..تجيبلي نوكيا كخه هات ايفون بكاميرتين ومصروفي مايبقاش ١٠٠ أرجوك خليها ٢٠٠..هاتلي الإسعاف ياخويا دي مراره مش ٢!
آخر العنقود ده حكاية..عيل فال كي جي تو
كل همومه.إني أبعد أحسن چيري هياكلوه!
وبعدت وكانت الكارثة..
أتكعبلت ف سجاده ورجلي راحت مكسوره..وحياتي بقت كالعادة فأر و إتزنق ف ماسوره..ولا هدفع حصة إبني ولا أجيب تليفون للتاني ولا حتى دوا لأمي ولا أبويا هيأنتخ تاني..ومراتي يا حلولي عاملالي ميت دكر..والوقعه غصب عني وهموت من الضجر..
ايه رأيك يا صديق في عبد الله الفقير
حالته لا طايله.. وزير ولا غفير
إلحقني أوام بسرعه بفانوس علاء الدين..أو حتى أوضه واسعه ف حلايب او شلاتين..منك لله يا بلدي يا مبهدله البدل .. يا عامله فيها حلوة ومليانه بالعلل..غرقتيني ف همومك وكرهت كل يومك بس ارجع أقول يا واد ..مالناش غير الأمل!

نقش الحجر صنعه

بنقش عالحجر لجل ما ينطق
طلع الحجر صوان تقول غبي أحمق
فضلت أنبش لحد مالايدين دابت
لا عمره يسمع ويفهم ولا يقوم يلحق
بنقش عالحجر لجل ما ينشق
لجل الظلام ينمحي والفجر بيشقشق
لا النقش شق الحجر ولا نهارنا بان
عُمر الظلام ساعه وساعات كتير للحق
بنقش عالحجر وعيوني مدبوحه
شفت اللي مات واتصاب ودماغه مفتوحه
حجرنا كما الحديد مافي عليه قادر
لكن بنار الظلم هيلين ويترقق
نقش الحجر عليه قالوا زمان صنعه
يهواها صاحب حق وبيبتدي بدمعه
و دمعة المظلوم تنزل عليه تكويه
وبكره انا دمعتي تنزل عليك بمدق

لن أكون

لم أكن يوما ضعيفا و لن أكون
لن تصنع مني جمادا يُرضي ما بك من مكنون
لن أرضخ يوما لمذله..لن أبكي كي أصنع ثورة
لن أدنوا أبدا بخيالي ..فخيالي حقيقة هذا الكون
فكياني أنا هاهو واضح و كيانك أنت أين يكون!
لن أجثو لرغبة منك تكون
لن أروي أراضي القهر دماء لتكفي نزعات المجنون
لن أصدق لك ابدا كلمة فكلامك أبشع مما يكون
لن اقبل ابدا ان احني ..ظهري لكلابك كي تعوي
لن أنسج معطاف القهر أو أُنشئ شلالا وعيون
فكياني أنا هاهو واضح و كيانك أنت أين يكون!

في ناس كتيررررر !

في ناس تشيل من عليها تراب تلقاها ماس
وناس مهما تشيل تلقاها صحرا ماتنداس
وناس لازم تتردم برمل وطين
وناس كل ماتلمع تلقى وشوشها مداس

في ناس ماشية بمبدأ"كلنا إنسان"
وناس كل همومها "أكل و منام"
وناس إدبح عيالها دبح و ماتنحني
وناس تبيع أهلها لجل الأمان!

في ناس تفرح و لو ب بسكوته
وناس عشان تفرح لازملها هوجه
و ناس حزنها ماساب مكان للفرح
وناس فرحتها في طبخه مضبوطه

في ناس فالوعود كلمتها حد السيف
وناس توعد و تخلف كما سحابة صيف
وناس وعدها على قد حال حالها
وناس وعودها أكم وتقول ده وعد الضيف!

في ناس فالحب تكتفي ب وردة
وناس تعبي تشيل مايكفيها الكلام ده
وناس حبها قلوب في الورقة مرسومة
وناس قلوبها حجر مهما تلين..جاحدة!

في ناس سياستها: كلنا واحد
و ناس بتسيس ألوان على الواحد
وناس مالهاش فيها و جاية تزيط
وناس نازله تبيع "سياسات ب جنية واحد"

في ناس فالحق تاخدلها نياشين
وناس من خزيها دفنه رؤوس ف الطين
وناس تكبش م الفقير قبل الغني
وناس تبكي من ضياعه مع الباطلين

في ناس ضميرها كما الأسد..جسور
وناس ضميرها ..كلب..تقول مسعور!
وناس الضمير عندهم كلمة و مكتوبة
وناس تلاقيه زي الإزاز ..مكسور.

في ناس ب قصص حياتنا مهمومه
وناس لو قامت قيامه ماتقوملهم قومه
وناس تقول: إجبر خاطرنا يا كريم
ده القلب شايل كتير والشيله بالكومه

في ناس فالحياة تكونلك أب و أم
وناس غاوية تشيلك فوق همومك هم
وناس نفسها ترمي حمل الكتاف عالأرض
وناس همّها الكرسي حتى ولو بالدم!

اصل الحياة أكيد لينا

اصل الحياة..شئ مش مهم
في دولة كل أمورها هم
في عيشة ضلمة عتمة غم
اصل الحياة دي مش لينا
عمرك فهمت معنى دم
ولا حلمت ف يوم ب حلم
صحيت لاقيت هو الأهم
تحقيقه يرهب أعادينا
إوعاك تقول أنا عمري راح
مابين هتاف و مابين نواح
وإن الضمير بقى غير متاح
صوتك صحى الضمير فينا
كذاب و ندل خسيس إلخ
أهو كله كان ناصبله فخ
وال كان عدو طلعلك أخ
وال كان منا صبح علينا
خليك قوي خليك حَمُول
خليك صابر على دول و دول
خلي الحقيقة تبان تقول
أصل الحياة..أكيد لينا

كل سنة و إنتِ طيبة ... بقى!

حبيناها و كرهتنا
وفي عيشتنا كرهتنا
و مرمطتنا وقتلتنا
ولسه عصره قلوبنا عصر
شيلنا هم و ما شالتنا
روينا دم و ما روتنا
تعبت معانا و تعبتنا
و هي ساكنه جوه قصر
يا بلادي حسي بيا
يا أم ماري و فاطمة و بهية
يا أحلى شمس مغربية
صابر عليكي أكَّمْ صبر
إلحقيني مره عايش
إفتكريني ف أي هامش
حبك داخل قلبي جايش
قلبك ليه عليا قبر
أخر كلامي في الحياه
إبنك جوه أرضه تاه
نفسه يكمِّل ما بناه
حلمه تبقي أحلى مصر

١-فبراير-٢٠١٣

الأوله سحلوا البنات
والتانيه عروا الرجال
والتالته الله أعلم باللي جاي
والرابعة والخامسة ولحد ما لانهاية له
برضه هراهن عالثبات!

غيرك مهم

النكته اللي ما تضحككش.. بتضحك غيرك
و الكلمة اللي ما تجرحكش .. بتجرح غيرك
و الألم اللي ما يوجعكش..بيموت منه غيرك
ماتستهونش أبدا ب"غيرك" و حط نفسك دايما مكانه.

أكيد هو مش غلطان لوحده..بس غلطان طبعا

طيب بالذمة أبقى أنا غلطان
سواق أو عامل مزلقان
علشان أجير شقيان تعبان
أصحى وأفوق على لقمة حاف
راميهالي واحد م الجيران
وأجري على حظي التعيس
و أتمنى أنه يموت فطيس
وألاقي الدنيا بالصدفة.. فاتحة البيبان
تفتكروا عشان من عيشتي زهقت
و زي بقية الخلق حلمت
أكون غلطان!
قالولي دي لكل البشر أشكال و ألوان
ولا عشان فقير غلبان!
عادي أتسجن أو أنام جعان
طيب إسألوا..كام واحد غيري له سلطة و ضهر وحيطان!
طيب إحسبوا.. كام واحد زيي كان شقيان ومن حياته طهقان كفران!
برضه إتحبس و للبدلة الزرقا إتلبس وهو من كتر اللبس يصرخ برررررئ ..
هاتولي اللي ماكفانيش هاتوا اللي لقوتي و قوت عيالي جايب بيه لحم و حشيش..
بنادي فيكم يا بشر يا ولاد الناس ..ياااا دراويش..
كمل و قوم ..ماتسيبش حقك لمدير وزير أو باش شاويش.
كمل و قوم.. وماتسبنيش
يعني أبوس جزمتك!! هو خلاص إحساس مافيش!
حاضر يا بيه هابكي وأقول أنا نفسي أعيش!!

عقلكم ف رأسكم

بعد صباح الخير إن شاء الله
لازم نتعلم بقى
١-الكلام المعسول مامنوش لازمه
٢-أوعى تعصر ليمون ع فرد عندًا في آخر
٣-في الإتحاد قوة حتى لو اللي جنبك ع غير دينك او رأيك
٤-إرمي مصلحتك الشخصية والحزبية ع جنب..مصلحتك الأولى والأخيرة في الوطن.
٥-إوعى تثق ف شخص خانك مرة حتى لو إعتذر
٦-كلام تويتر مابيجبش غير وجع الدماغ..إنزل وري الناس شغلك عالأرض.
٧-كفانا مركزية:مصر مش قاهرة وإسكندرية والقاهرة مش زمالك ومعادي ومصر الجديدة
٨-إوعى تقول إنه بيدي الحلق للي بلا ودان..ودانك موجودة والحمد لله والحلق كمان موجود..لكن مش هيجيلك غير لما تبذل جهد كبير و منظم عشان تستاهله
٩-إفتكر إنك لما تقلل من شأن اللي قدامك مش إنتصار ليك..بالعكس ده إنتصار ليه لأنه بيلعب ساعتها دور الضحية الذي يجيده،إشتغل وسيب الناس تحكم.
١٠-وأخيرًا.قاطع واضرب واعتصم لما تكون ف بلد بتحترم ده ويكون ليه فايده مضمونة..غير كدة ماتسيبناش نلبس فالصندوق وتجري وتعيط بعد كده ونعيط معاك
و عقلكم في رأسكم بقى
Y.S.

يا رب نعقل

إنت فاكر أن الدنيا دايمة!
تبقى واهم ..تبقى كافر
بالقيامة اللي بكرة قايمة.
أوعى تظن الحياة مركب و عايمة!
ف لحظة طوفان تلقاها جوة البحر نايمة.
وانت هتندم، ليه ماسمعتش صوت نجاه!
لكن غرورك..وصل معاك لمنتهاه.
بس انت برضه عنيد..كل ما تجيلك إيد
تصرخ تقول ده عدوي ..بيخلي جروحي تزيد
بس الحقيقة انك دماغك ناشفة
فاكر اللي عكسك دماغة عليك قافشة
أسفي عليك ما له حدود ولا بر
ولجل اللي بينا من عشرة و خير أو شر
واجبي أنصحك يا أبو جلابية وسبحة
يجي الطوفان مابيفرق بين صراخ او بحّه
كلنا في مركب واحدة والشراع مايل
والموج اهو بيعلى و البحر لكلمته قايل
يا نفوق ونعدل المايلة يا نغور ويبلعنا
ولا يأسف علينا كون ولا يبكي اللي ضيعنا
لكني بنصحك و انا آملي فيك معدوم
برضه واهم ..برضه فاكرها تدوم
وبرضه ناسي ان القيامة ف يوم هتقوم :/