شنطة بني ..فيها حاجتي
فيها من بختي و كرامتي
فيها من كدبي وصراحتي
فيها من كل العبر
شنطة غالية أصل فيها
شئ فخيم ومعتبر
ال ياما في عمري شوفته
وال كان يا ماكان قابلته
وال كان خفيف وشيلته
وال أتقل من حجر
فيها ذكريات أليمة
شنطتي قلب اتقهر
شنطة بني فيها يومي
فيها من ضحكي وجنوني
فيها من أملي و ظنوني
فيها جبر ال اتكسر
شنطة أبدا مش عادية
مليانة حكاوي و سهر
كل حاجة فيها قسمة
عمري كله زي نسمة
دمعة ضحكة حزن بسمة
زي ما كل البشر
نفسها تخبي ال فيها
جوة شنطة بني لكن
جاهزة دايما للسفر
