وانت زهقان

وانت زهقان م الوجود

شايف كل الدنيا حدود

شايف سجن وعتمة وضلمة

شايف جثة يأكلها الدود

وانت قرفان م البلاد

والعباد تظلم عباد

المدن صبحت خراب

والقلوب عبّت سواد

وانت كفران م ال حاصل

اي حد بقرشه واصل

وانت وحدك ف الأذية

انت وحدك ف الفواصل

عارف ليه صبحت هذا!

مين اخد عمرك اجازة!

يوم ف شهر ف عمر يجري

منك انت ل ماله عازه :/

أصلك انت بقيت غشيم

فاكر كل العتمة غيم

فتح واعرف انه خانك

حول الكريم لئيم

تعرف!

تعرف الهايف من ايه!

للهايفة يتصدر

والخايف يخاف من ايه!

من حلم متقدر

طب دمعه نازل ليه!

عالحلم مش قادر

والقدرة دي من السما للي طريقه اخضر

تعرف حبيبك عسل!

ماتلهفوش كله

ده الحب زي العسل!

كتره يزيد غلبه

حبه لو طال الجبل!

يا قهرته و ذله

حب العقول مرتاح!

الراحة ضامنها.. لقلوب بتسمعله

تعرف الأدب ازاي!

قالي ده راس مالي

تعرف تجيبه ازاي!

رد..علمته لعيالي

بتلاقي وقت ازاي!

قالي العيال مالي

مال الغلابه عيال

لدنيتي زينه .. مالي .. ضنى غالي

تعرف صاحبك منين!

من وقفة الشدة

جدع ومالي العين!

على قولة الجدة

ولو بقوا صاحبين!

في الشدة دول عدة

ولو بقوا اندال!

الندل ماله اصحاب ولا كلام من ده

تعرف تكون إنسان!

في زمانا صاروا قلال

تعرف تكون خَوَّان!

أعوذُ من ده الحال

تعرف تكون فلتان!

حالي وكتير أحوال

فلتان تخون إنسان!

اقدر اخون نفسي ..وابقى ف راحة البال

في غمضة رمش

مش كل من كان له قرش صبح مأمون

ولا كل من سكنله عِش كان مهموم

ولا كنّا احنا كما كانوا وصبحوا نجوم

ولا هم عالهموم همّوا و داروا الوش

قرشك يقدر عليك ومن حواليك يهدك هد 

وعشك يحميك وكل ماليك لسابع مد

لا قوة راح تنفع ولا الدموع عالخد

ولا تحني ظهرك للبعير ولا تكوِّش

اعرف حدودك فين وبعده ما تخطي

حد الحدود مرصوص وخاطه انا بخطي

حد الحبيب ده جميل يا ريحه لمشتِّي

حد الغريب غدار احذر ولا تخونش

الصبر صابر ع البطون والجوع  

وصبرك عالحمول قادر يضوي شموع

وضحكة في القلوب كافية تلف ربوع

وكسرة في القلوب توجع ولا تخربش

يا حيرته و قلة الحيلة ف دا ملكوت

يا سطوره حزينة وقصيرة ف قصة موت

اديله فرصة للعيشة! .. ارميله بخوت!

ده عمره طاير بعزقة ف غمضة رمش