البخت مال

ماهو اصل البخت مال

من كتر ال بقوا شمال

العقل خلاص اتحير

والقلب خلاص اتغير

وأنا حالي أصبح حال

أبكي عالدنيا دي ليه!

وأشكي وأحكي على إيه!

ده أنا فيه ال مكفيني

م الهم قوام تلاقيني

صحصحت وبقيت عال

أصلي إتعودت على ده

والقهوة بأخدها سادة

وأنا هأفضل أجري وراها!

وأتشحتف على ذكراها!

وأنا اصلا مش عالبال!

ما كفاية صد يا دنيا

ده إحنا بنرش كولونيا

علشان ريحة أيامك

وطريقنا يبقى سالك

هنغني فشر متقال 

بتستنى

بتستنى 

أقول حاجة

وبستنى كلام منها يفرحني

فيجرحني سكوتها ليه!

مانا الأول سكت كتير

وخد منها أكم تفكير

عشان تلمح في عيني الرد

فتستنى

لكني كنت بتأنى

ومستني كما الملهوف

في قلبي حروف 

مافيش غيرها يكملها

ماليش غيرها في هذا الكون

هيفهم كل هذا الجد

فبستنى

فيجرحها سكوتي كمان

ويبدأ جوه قلبها شك

لا يمكن قلبه كان بيحب

ويسيبني وحدي من تاني

لا يمكن يبقى ده أناني

إزاي يقدر على ده البعد!

فتستنى

وبعد كتير

أقرر إني أنا أصارح

مانيش قادر خلاص أخبي

بكل ما كان ..هأموت وأحكيه

لقيتها جاية بنفس الشوق قالتلي عليه

بأحبك قبل ما تنطق

ماتيجي شوية ننسى البعد.

وننسى ال قالها في الأول

ونتمنى ..ما نرجع تاني 

نستنى 

درويش في حبك

حفنة تراب في الإيد

طارت في هبة ريح

وده اللي كان باقي

من قلب داب تلميح

قلبي الصغير عاشق

وقايدلك المصابيح

مصابيح تقيد الهوى

في عتمة المجاريح

فحضرتك بأبقى

زاهد مع التسابيح

بأدعي و أقول يا الله

وأزيده م التواشيح

درويش في حبك أنا

وغزلي ليكي صريح

وحدك معاكي الدوا

وفي ايدك المفاتيح