بكوباية الشاي فالبلكونة
وبچامتي الكستور الأزرق
على سور انتيكا بيتلقلق
شوفت الحكايات
يحكوها الناس بلا اي كلام
شوفت الأيام
على وش الخلق اما بتجري
تحفر تجاعيدهم من بدري
تشهد أحزانهم وأفراحهم
تشهد مواويل
تتغنى على شطوط النيل
إيشي كان عايش ميسور الحال
وايشي متكوم بمرات وعيال
والباقي شكواهم في سكوتهم
من سوء الأحوال
شوفت الأهوال
شوفت العاشق غلبان محتاس
حبسوا حبيبته وقفلوا الترباس
وياعيني عالحب وهيبته
لما الأحلام تصبح كوابيس
ولا عمره خلاص راح يبقى عريس
شوفت المتاريس
ناس داخلة عليها بكل جسور
يبنولها أسوار فتهد السور
وناس داخلة تهيص
شوفت الأندال
بايعين برخيص
شوفت الشاطر واقع واقعة
وأصحابه لا شايفة ولا سامعة
وباعوا سنينه
كانوا خادعينه
وسمعت كمان وكمان وكمان
عن ناس تتلون كالألوان
تعرف مكاتيبهم م العنوان
وسواد سايد
واحنا في تلك الدنيا وحايد
لا هنفضل فيها لآخرها
وحياتنا اهيه رشة في دواخلها
حوادثها تقيلة وبتعلم
وماعدش باينلها من اخر
لِسَّه بعافر
هفضل أعافر
ماهي ياما بتلطش في المؤمن قبل الكافر
وأنا لِسَّه في بلكونتي بهوي
على دماغي الأكبر مني
ببيچامتي الكستور الأزرق
وكوبايتي وشايي ..وبتفرج ☕️
