يا وحشاني

حبيبتي .. 

هأقول كلام مالوش معني

ومستني عليه تفسير

ولو ردك هيبسطني 

فممكن أطير مع النغمة

كلامي كتير وفي المجمل

بتبقي العكس والمعنى

ولو معنى

اني اسيبك هيتولد في قلبي مكان

لأيا كان

فمش سايب

ولا غايب

ده ف الأحلام

بتبقي الأصل والمضمون

وتبقي لعقلي كل الكون

وتبقي كمان

على وترُه

أكم ألحان

بتنحت فيا ألف شعور

فأقوم مذعور

من الكوابيس

لا تتحقق

وأنا عندي كذا مبدأ

لا يمكن أسيب

ولو كان الألم فيكي

أموت مقتول

وأنا المبسوط

ولو كان العذاب بيكي

أقول تاني 

لحد الموت

فتفضل صورتي في عينيكي

ويفضل نبضي جواكي

وتبقي الأصل و المعنى

يا وحشاني

  

مابقيتش تفرق

مركب تعدي وكتير بتغرق

عمر ال مات ماعادش يفرق

وناس بتصحى على لقمة حاف

وناس تنام من غير ما تقلق

وسط الزحام حلمك فاشوش

قيمتك وبهتت زي الوشوش

وصورة ليك كانت في جيبك

من غير ملامح .. ما تميزوش

كائن هلامي بدون طموح

قتلوا في عمره من غير جروح

قاعد يعافر يمكنها تحلى

يمكن في يوم يبانله روح

عادي وخلاص ما بقتش تفرق

جاله الخلاص ولا هيغرق

ده لسه ناس بلقمة حاف

وناس تنام من غير ما تقلق

إسمحيلي

اسمحيلي إني اقولك انك انتي الاختلاف

حلوة مُرة.. زيطة هادية

كل حاجة فيكي ليه ماشية عكس الإتجاه

شئ غريب حبي ليكي حب غير كل الالاف

حب زاهد فالزمان حب يملاه الجنان

شوق إليكي ..خوف عليكي.. حب كافي للحياة

عارف إنك يوم ما قولتي كنتي هايبة الإعتراف

كنت شايف جوه قلبك ..جوه روحك جوه عقلك

كنت بس نفسي أضمك زي عاشق م الهواة

اسمحيلي كمان أقولك إن قلبي معاكي شاف

معنى تاني للجمال.. معاني تانية للدلال

انتي بالنسبة لي حالة مستحيل فيها إشتباه

وعد مني إني أطبطب وقت ما يكون الخلاف

وعد أكون ليكي الأمان ..وعد مايكون الهوان

عمري كله ملك إيدك.. ده إنتي طوقي للنجاة

احكم دايرتك عالقد

أحكم دايرتك عالقد

عيلة و أهل وأصحاب

خلي الجدع فيها

والندل ما يقرب

ولو في يوم جرّب

فرحك قوام يتهد

احكم دايرتك عالقد

لحد ما يبانلك صحاب

واحد يكونلك سند

والتاني يلحقك وقت القلق والغرق

والتالت يسمع شكوتك

وقت أما الهموم تشتد

احكم دايرتك عالقد

ده الكُترة غلبت شجاعة

تلقى الضعيف عليك قوي

والضحك في وشك غلي

وبقيت كما التايه

في صحرا مالهاش مد

احكم دايرتك عالقد

وأنسى المعزة والكرم

تكرم لئيم ما يشيلها

وتبقى زي غيرها

وباب المعزة يتقفل

ويبنوا بداله سد

احكم دايرتك عالقد

بابك ما يطرقه خاين

قلبك ما يسكنه بايع

ولو في الهوى ضايع

تلقى كلامه عليك

ماله حدود ولا عد 

احكم دايرتك عالقد

ترتاح من ده وده

تلقى في راحة البال

كتير يروق حال

وجراح كتير تلتئم

وفرح ما يترد

وقت الوجع

 وقت الوجع 

بتفكر ف اللي مزعلك

وتقوم أوام شايل في قلبك م المنقي و البدع

ويتقهر اجدع جدع

ويجيب قديمه عالجديد فيتكسر

تنسى ال كان مفرحك

اصل الفرح وقته قليل

يتقال بداله كلام كتير

ولو انذكر.. بتبقى لمحة صغيرة

اصل الفرح لو اتحكى بيتنظر

اما الوجع.. بقى هو ده ال مالوش كبير

جرحُه تداويه.. ووجعه ليك كأنه بير

مالوش قرار.. مُصِّر انه يغرقك..ويملى جوفك بالمرار

وإن بات رماد يصبح في نار

ويتفضح ضعفك خلاص بين البشر 

ساعة الوجع بتبقى ف جمع.. كما المفرد

حافظ ردود الناس كما اسمك

معلش، يمكن، يهونها عليك الرب

فتختصر طريق م اللي مالوش عازة

وتحضن دمعة جوة العين وتشرب ضحك في إزازة

وتمشي الدرب

عارف بقى!

لو سيبت نفسك للوجع هيزيد عليك

يكتم بكفُّه على روحك وبأنيابه هينهش فيك

لكن عشان مانتاش عبيط 

بتنفض أرض قلبك نفض 

وترفض يبقى مفروض فرض..وتقوى عليه

اصل الحياة داين تدان

يوم م الوجع تعيشه غصب

ويوم تاني يكون م الفرح

نقطة رجوع بنجري وراها حتى الآن

لكن الجدع هو ال يبقى بمية جدع و يلئم جرح..وقت الوجع

ثم جرحك إندمل

ثم تنسى انك انت

وانت تايه جوة نفسك

ثم تعمل م الحكاية

حرب جامدة كاتمة نفسك

ثم تتعب م البداية ثم تكره النهاية

ثم ينهشوا في كرامتك

ثم تطلب م اللي حولك ينسوا صوتك ينسوا رسمك 

ثم كانت القضية

لفة طرحة وجلابية

ثم ثائر ثم جائر

ثم باع عيون بهية

ثم لفك لف بفرة

ثم هبدك هبد صخرة

ثم تصحى تلقى نفسك م الجراح مردوم بعفرة

ثم انك كنت فاشل

كنت فاكر قادر تعافر!

ثم صاحوا قالوا قاتل

ثم بقيت قادر وفاجر

ثم للبلاوي قابل

والبلاوي كتير أكابر

ثم تتفاجئ بلومهم عاللي سافر واللي هاجر

ثم ان مافيش أمل

ثم جوع ثم رجوع

والجراح لا تحتمل

ثم تلقى بين ربوع

انت الحمولة والجمل

ثم فرحة بالدموع

ثم حلمك اكتمل

ثم يصبح جرحك انت م اللي فارقك واللي خانك ..إندمل

يرضى فيرضى عنه

يبحث عن ذاته بذاته.. فيجد أنه لا يملك منها شيئا.. يملكها صاحب الملك العظيم والحبل المتين.. يرى أنه أقرب إليه من ذويه وصاحبته و بنيه.. يشكو همه فلا ينصت غيره.. يفرح ثم يحمده فيزيده من نعمه.. يرضى فيرضى عنه.. يسبح بإسمه ذو الجلال والإكرام ..فيكرمه من عظيم عطائه.

اليوم الدولي للمرأة #IWD2016

ولسه بتعافر زي اول يوم ما جت.. شايلة هم حاجات كتير تخص حد.. لم تشك لحظة أبدا في الخيال.. بتقول تقدر تشيل حمل الجبال.. وده مش خيال ..شايفة ان حياتها كلها داين تدان.. وان كل ال راح منها راجع كمان.. وإن شكت فيوم لحد.. بتبقى خلاص خدتها جد.. الكتف ال ياما شال .. تعب واتهد.. وأحلامها ال ما ليها حد.. دابت أوام.. بلبعتها عشان ولادها اكيد ليهم احلام اهم.. وأما تكبر اكيد هيشيلوا عنها هم.. تنفرط سنين حياتها منها فرط.. تفتكر لحظة ما كان الكتف شايل كتير عليه.. هو هو نفس كتفها ال هيحنّوا ليه.... راحت عليه! 

للبوح حدود

للبوح حدود.. إلا مع الله

تظن انك تستطيع الكلام.. ترتاح لهم.. يفهموك بنظرة.. وتأتي اللحظة المنتظرة.. لكنه واحد قادر على ارجاعك.. وحده قادر على فك كروبك و شفاء أوجاعك.. وحده يعيدك الى نفسك..بنفسك.. وحده يبث فيك من روحه ان انتظر ..لا احد يستطيع تحمل فوق طاقته.. فقد حملوا قدرهم.. ولتحمل أنت مقدارك.. عد الى رشدك.. عد الى كتمانك.. عد الى فقاعتك.. وأبصر..وأصبر.. وإنتظر.

زهد راغب

أحيانا تظن أنك راغب الشئ ولا تعلم كيف تحصل عليه فتترك الأمر للأيام والزمان ليصلحا ما بدا لك خطًأ سابقا.. ولكن إنتظارك بغير جدوى .. وتوقعاتك بغير محلها.. يجب أن تعلم أنك إن رغبت الأشياء ولم تنل مرادك وجب عليك زهدها.. فالتخلي يصبح أكثر عقلانية وواقعية من الرغبة.. حينها فقط ستعرف جيدا قيمة ما تخليت عنه.. حينها فقط ستعرف جيدا أن التخلي أفضل من اللهث وراء ما لن تستطيع معه صبرا.. حينها فقط ستعرف أن ما كان مقدر له أن يكون معك ما كان ليخطئك.. وما كنت ستنتظره .. ترغبه.. أو تزهده.

اكتب على الهامش

اكتب على الهامش

سنة و خلاص عدت

والكل ما صدق

وعشان ما نتعلم

هات القلم الأزرق

واكتب ورايا دروس

منها هنتعلم

إكتب أماني كتير

وادعيلي تتحقق

اكتب بخط كبير

على طرفة الكراس

لا ال راح يرجع

ولا عالباب حراس

ولو مقدر زعل

هتزعلك جامد 

ولو مقدر فرح

هتجيلك الأعراس

اكتب بخط صغير

في مربع على الجانب

العقل متحير

من غلبه الغالب

والقلب متخير

بين الشطوط دايب

يارب يا تريحه

يا تعدل القالب

اكتب بخط جميل

في وسط صفحتها

سنة سعيدة ياليل

تكمل بخفتها

اديني منها كتير

من قلب سعادتها

و ندرٍ عليا أدعي

ننول محبتها 

امضي في آخر سطر

انا الموقع هنا

راضي بكل كتاب

مكتوب من ربنا

يفتحلي م الأبواب

كل اللي متسكر

يحسبلي كل حساب

بميزان من الجنة