شعب قادر شعب فاجر شعب فيه كل العبر
شعب فكر..شعب حرر.. ولسه جواه الأمل
شعب محبوس جوه قُمقُم الندامة والفشل
شعب مقتول جوه بلده ولجل بلده اهو قتل.
شعب جبان..وفالميدان أشجع حتى مالأسد
شعب خاين..بس عمره للعدو ما كان سجد
شعب بالفلوس لعبُه.. شعب بالنفوس لعبوا
ويلعب بالزلط سيجا ومرمي فبيته انتيكا..
ولو تروقله الحياة سيكا.. بيدي للعيال لعبه.
شعب غادر شعب ظالم لو يطول م الزمن سُلطة
شعب غلبان بس صابر لم يطول ولو خُرقة.
شعب متحرش وندل ومش قادر على نفسه
شعب محترم جدا.. ومش ممكن يبيع نفسه
شعب طلع أكم ملايين لجل مايحرر علم
هو هو بملايينه واخد القلم.. مليون قلم
شعب يبيعك كده وقتي كما القهوة بدون
الوش
الوش
شعب ماشفش غير اصلا وشوش بتغش
شعب راكبله مرجيحة ومستمتع ومتسلطن
شعب راكب عليه كرسي عجوز لكنه متفرعن.
شعب لازم يتحكم كما قالوا بحديد ونار
شعب رقيق و مالرقة وغلى الأسعار..يبات محتار.
شعب فوكاهي وضحكته تهز جبال
وهو هو وف كفنه وحيد رحال.
شعب ذكي وف طفولته مافيش اتنين
شعب لئيم وف عجزه بيتحكّم كما التنين.
شعبي ده بقى ولا.. صبح شعبين
ولا هي الحياة أمست كما مستشفى للمجانين؟!