كون نفسك

هتلبس توب غيرك..هتعاني فوق عمرك أعمار..هتلبس توبك إنت..هتعاني برضه بس عمر واحد..اللي حيلتك..قسمتك !

إفتح عينيك للدنيا بكل حذر

افتح عينيك للدنيا لف وشوف.. دي الحياه فيها ياما وياما ظروف... لا بتحن عالفقرا ولا بتحمي غني ..لكن في ايديك تعيشها من غير خوف..
إفتح عينيك للدنيا بص و طل.. إوعاك تنحني لما يهون الذل.. إوعاك تنسى حلم العيش بحرية.. هي اللي باقيالنا مهما يموت الكل..
إفتح عينيك للدنيا بص كمان.. هتشوف بطولها وعرضها أكم حيوان.. فيها ال يفترسك كما لو كان أسد.. وإنت بلا حولَ تعيس غلبان..
إفتح عينيك ليها بس ماتبرقش.. أنوارها تعمي عينيك وبرضه ماهتلحقش.. لا تاخد بكف كفيف ولا الطريق يظهر.. بصلها بطرف العين وعيشها من غير قفش..
إفتح عينيك ليها بكل حذر.. إوعى تخاف من العفاريت أو مالبشر..لكن خلي العيون ف وسط الرأس مفتّحين.. ولا تبكيهاش عاللي خانك أو ليك غدر.
إفتح عينيك ليها وإياك يغيب عقلك.. لا تمشي ورا كذاب ولا اللي يحلقلك.. قالك يا ولدي زمان واحد كأنه حكيم.. عقل البشر أنواع تهلِكها أو تهلَك..

مواطن مطحون متوسط الدخل

عجبت لزمان ..الولاد الأشقيا
قال ايه عاوزله لقمه زي الاغنيا
وشغلانه مهمه.. وبيت لجل الدرا
قولتله ياخي وضح!! أصلي من الأغبيا
قالي دي العيشه مره وكله فالهوا
الست امي العجوزة طلبالها ميت دوا
والحاج كمان اهوه ..مأنسنا يا سكره
ومراتي "عايزه..عايزه" تقولش سفير نوايا ولا مخبي الخبايا..ماهو علي عينك يا تاجر ده زير سانده النوا
وعيالي ٣ يا بيه.. دي نصيحة ماما كريمة
وبرضه العيشه صعبه وفلوسي مالها قيمة
عيل يا دوب ف ثانوي والحصة مرتب شهر وأنا بين درسه الخصوصي وخروجاته المخصوصي داير علي كعب رجلي وأهوه عايش ف قهر
الوسطاني ده غلبان..قاعد أيده على خده
اقوله خير يا حبيبي..يقولي عاللي عنده
عايز تليفون يا أبويا إوعى يكون أبو خطين..تجيبلي نوكيا كخه هات ايفون بكاميرتين ومصروفي مايبقاش ١٠٠ أرجوك خليها ٢٠٠..هاتلي الإسعاف ياخويا دي مراره مش ٢!
آخر العنقود ده حكاية..عيل فال كي جي تو
كل همومه.إني أبعد أحسن چيري هياكلوه!
وبعدت وكانت الكارثة..
أتكعبلت ف سجاده ورجلي راحت مكسوره..وحياتي بقت كالعادة فأر و إتزنق ف ماسوره..ولا هدفع حصة إبني ولا أجيب تليفون للتاني ولا حتى دوا لأمي ولا أبويا هيأنتخ تاني..ومراتي يا حلولي عاملالي ميت دكر..والوقعه غصب عني وهموت من الضجر..
ايه رأيك يا صديق في عبد الله الفقير
حالته لا طايله.. وزير ولا غفير
إلحقني أوام بسرعه بفانوس علاء الدين..أو حتى أوضه واسعه ف حلايب او شلاتين..منك لله يا بلدي يا مبهدله البدل .. يا عامله فيها حلوة ومليانه بالعلل..غرقتيني ف همومك وكرهت كل يومك بس ارجع أقول يا واد ..مالناش غير الأمل!

نقش الحجر صنعه

بنقش عالحجر لجل ما ينطق
طلع الحجر صوان تقول غبي أحمق
فضلت أنبش لحد مالايدين دابت
لا عمره يسمع ويفهم ولا يقوم يلحق
بنقش عالحجر لجل ما ينشق
لجل الظلام ينمحي والفجر بيشقشق
لا النقش شق الحجر ولا نهارنا بان
عُمر الظلام ساعه وساعات كتير للحق
بنقش عالحجر وعيوني مدبوحه
شفت اللي مات واتصاب ودماغه مفتوحه
حجرنا كما الحديد مافي عليه قادر
لكن بنار الظلم هيلين ويترقق
نقش الحجر عليه قالوا زمان صنعه
يهواها صاحب حق وبيبتدي بدمعه
و دمعة المظلوم تنزل عليه تكويه
وبكره انا دمعتي تنزل عليك بمدق