أحكم دايرتك عالقد
عيلة و أهل وأصحاب
خلي الجدع فيها
والندل ما يقرب
ولو في يوم جرّب
فرحك قوام يتهد
احكم دايرتك عالقد
لحد ما يبانلك صحاب
واحد يكونلك سند
والتاني يلحقك وقت القلق والغرق
والتالت يسمع شكوتك
وقت أما الهموم تشتد
احكم دايرتك عالقد
ده الكُترة غلبت شجاعة
تلقى الضعيف عليك قوي
والضحك في وشك غلي
وبقيت كما التايه
في صحرا مالهاش مد
احكم دايرتك عالقد
وأنسى المعزة والكرم
تكرم لئيم ما يشيلها
وتبقى زي غيرها
وباب المعزة يتقفل
ويبنوا بداله سد
احكم دايرتك عالقد
بابك ما يطرقه خاين
قلبك ما يسكنه بايع
ولو في الهوى ضايع
تلقى كلامه عليك
ماله حدود ولا عد
احكم دايرتك عالقد
ترتاح من ده وده
تلقى في راحة البال
كتير يروق حال
وجراح كتير تلتئم
وفرح ما يترد
