بأحاول اكتب كلام فالحب مابلاقيش كلام كفاية يوفيها حقها ست الحبايب وست الناس كلها
واحدة عاشت عمرها عشان طفل زنان.. مراهق مزعج.. شاب تربيته مجهدة ومكلفة.
واحدة تشوفها فالشارع لو سألتك مين دي هتقولي ست يعني هتكون ايه يعني!
واحدة معاك في بيتك .. أمك.. ماتعرفش قيمتها
واحدة ربنا خلى الجنة تحت اقدامها وانت لسة بتسأل ليه! هي عملت ولا بتعمل ايه زيادة عن ال انت بتعمله!
واحدة عادية جدا "زي ما بتقول عليها دائماً" لكن فالحقيقة هي مش عادية
هتقولي ازاي! هقولك ببساطة: انت تقدر كل يوم تصحى بوجع وتكسير ف جسمك كله ومع ذلك تكمل شغل عادي من غير ماتاخد اجازة مرضي! او تريحلك ساعتين تلاتة فالسرير!
انت تقدر تستحمل ٩ شهور شايل وزن زيادة ماهواش اكل وطفاسة!
انت تقدر كل يوم تغير حفاضات ابنك اكتر من ٥ مرات حتى لو هتاخد فلوس وتبقى دي شغلتك! طيب هتقدر كمان تأكله! تقدر معلش كمان تكرعه وتهشتكه!
تقدر تقوم ف عز نومك من غير ما تتعصب على صريخ طفلك! وكمان لازم تضحك ف وشه وتأخذه بره الاوضه عشان الناس تعرف تنام ف هدوء!.. ممكن بقى تذاكر لأولادك! بعد ما تخلص وديهم تمارينهم وياريت فالنص تحضر الغدا وتغسل الغسيل و تنشره ولما ينشف تطبقة وما تنساش تكوي هدوم مراتك ال هتروح بيها الشغل وإياك تضيع الشراب بتاعها.. إياك!
معلش بتعبك.. الأولاد في الكلية.. إياك تبطل قلق عليهم.. كلمهم كل شوية اتطمن.. البلد مافيهاش أمان.. وصلهم الصبح عشان مايركبوش مواصلات فالزحمة.. روح شغلك بعد كده بس ماتنساش انك هتعملهم محشي عالغدا النهاردة وان عندك كوافير بالليل عشان مراتك ما بتحبش دقنك طويلة ولا شعرك مش مهندم!
الأولاد رجعوا.. في حد عيان ومراتك مالهاش مزاج تنزل.. خدهم وديهم للدكتور وهات أدوية طبعا وماتنساش لما ترجع تحضر لمراتك العشا دي قاعدة مستنية!
الأولاد بيتجوزوا! انزل نقي وهات وافرش وضبط ..وأقلق هيبقوا سعداء ولا لا!
اتجوزوا! سابوك لوحدك! قاعد طول اليوم فالبيت ماحدش سائل فيك عشان مراتك في الكافيه مع صاحباتها بتلعب طاولة! وولادك يوم ما يعبروك يكلموك فالتليفون او زيارة على قد حالها!
اكتشفت ان عمرك ضاع فجأة! شبابك لضم في شيخوختك مرة واحدة! دلوقت انت فاضي تقدر تعمل ال نفسك فيه طول عمرك.. بس فين عمرك! خلص على اولادك... تاخد فلوس قد ايه وتضيع عمرك عشان ناس تانية!
أمي و أمك عملوا كل ده من غير فلوس ومن غير ضجر ومن غير زهق بالعكس كانوا بيعملوه بكل فرحة وحب.
ربنا يخليكي لينا يا أمي.. والفاتحة لكل أم لضمت سنين عمرها في بعض وقدمتهولك هدية.
