صوتك ونس
ضحكك نفس
وان كان على القلب وهواه
واقف عليه مليون حرس
يحموه من الناس كلها
الا أنا
وكأنها
راحتي ال كانت منتهى
حد الهوس
راحت معاه
وفضلت واقف فالحياة
عصفور فقفصه أهو إتحبس
فكري التبس
مجذوب يا ناس عقلي اتلحس
ودوايا بس في نظرته
ده في حضرته
بألقى الونس
وبضحكته
بأخد النفس
مليون نفس
مشيت فالدنيا عمياني
فاكرني بأشوف
وتلطش فيا مية مرة
وأقول عادي
ما يمكن تبقى بس ظروف
فتكسر قلبي بالمرة
ومش راضي
أفوق منها برغم الخوف
فأشوف بالغصب
ويطلع لطشها فيا مجرد شطب
لذنوبي ال محاوطاني
وعندي اللي مالوش تاني
بقيت المجني والجاني
فأجري عليه وأنا ملهوف
ويفتح ليا طاقة نور
بعيد يمكن ومش شايفه
لكن عارفه
فيخطفني كما المسحور
فأقرر أني لازم أشوف
وأشوف فعلا
وكأني كنت لم أعلم
فبان اللعب عالمكشوف
وأظن إني خلاص شايف
خلاص عارف
مانيش خايف ولا مكتوف
يهيألي إني راح أقدر
أواجهها وأنا بطولي
فنوره يختفي ونوري
يضلم كل شئ واضح
فبمشي فيها وأنا سارح
فتلطشني كمان مرة
وتكسرني كمان مرة
ما أنا ال رجعت من تاني
ومشيت فالدنيا عمياني!
عمرك قلبك عيط قبل عينيك!
ولو تلاكيك!
صوت مبحوح
وروح بتروح
نفسك مش قادر يكفيك
حد كأنه بيخنق فيك!
عمرك توهت فوسط الناس
بلا إحساس
شايف!! سامع!! بس خلاص.
حطيت قفلك عالشبابيك.
عمرك كان لك حتى شريك!
يمسح دمعك وينسيك!
ال آسيته في عمرك جايز
وال ما طولته وبقيت عاجز
وال خفيته في درجك يمكن
أو جوة القلب في براويز
جرب تبكي بعينك وارد
دمع العين قادر يشفيك
وإرحم نفسك تكتم لأحسن
دمعة قلبك تكسر فيك.