للحزن هيبة في صمت
يهجم عليك بالكوع
مهما تقول موجوع
يزيد من قوته فالضرب
مع ان حاصل ضرب
الحزن والكتمة
يساوى كل الكرب
فتبدأ الأزمة
يضيق عليك حالك
ويسألوك عالبال
ردك يكون حاضر
رايق وعال العال
دي اجابة بتريح
مش كل مِن سألك .. تحكيله وتسيح
ما لينا رب كريم
تجري عليه موجوع.. ينفض همومك نفض
وعشان عارف ان علاج الحزن عمره ما كان بالرفض
راضي بما قسمُه وبالمكتوب
وبرغم إن كل شئ في حسبته محسوب
وإن ال عدى كان .. في وقت ما هين
وده برضه هيتلاشى وهيعلم
وعارف إن الوجع بيقل .. مع مرور الوقت!
.....
لكني مش قادر استحمله دلوقت.
