ڤاترينة ..
الكل فيها متزوق
الكل فيها متلون
وتلقى الكون ولا بيفرق
وتلقى الحزن متكوم
وهو وحيد
قليل البخت والحيلة
مالوش فالحسبة والمواعيد
فييجي الوقت ويحاسبه
ويأخده كف ملو الإيد
ما يقدر منها يوم يهرب
ولو جرب
مالوش غير حل بين اتنين
يا يبعد عنها
يا يقرب
ولو قرب
بتبقى كل الوشوش عيرة
ما يتكسفوش
ولكل خلق تسعيرة
وحلق حوش
ويفضل هو في متاهة
فيسأل طب هيحصل ايه
مادام عالقرب مش قادر
أكيد عالبعاد هأقدر
فيبعد يلقى خلق كتير
من الڤاترينة هربانة
تلملم ال فاض منها
ما يتلمش
ومهما يحاولوا يجاروها
بتلطشهم وبتلوش
مافيش من وجعه أي مفر
بيلقى البعد كما قربه
وكالمضطر
بيرجع تاني للتمثيل
فيفضل فيها متزوق
بشخصية بلا تفاصيل
بينسى كل أحلامه
ويستنى تبقى مش موضته
فتفرط منه أيامه
وتبقى السيرة مش سيرته
فيروح كما أتى منها
ويرجع تاني يبقى وحيد
وفنفس اللحظة وتاريخه
بيفضى مكان في ڤاترينته ..لحد جديد.
